“SA tingin mo, may asawa na o matandang dalaga si Mam Dioscora, Kuya?’’ tanong pa ni Maria na halatang gustong pag-usapan ang babae.
“Palagay ko may asawa na.’’
“Bakit?’’
“E ‘yun ang tingin ko.’’
“Maganda ang body?’’
“Oo.’’
“Seksi?’’
“Medyo.’’
“Anong medyo?’’
“Seksi na nga, kulit mo naman.’’
Humagikgik si Maria.
“Mag-aral ka na ng lesson mo.’’
Tumalikod si Maria at pinagpatuloy ang paghuhugas ng pinggan.
KINABUKASAN, maraming customer sa shop. Mula alas otso ng umaga hanggang alas dose ng tanghali walang tigil sina JC at Mulo. Si Kuya Dads ay nagpaalam na may aasikasuhin sa city hall.
Mag-aala-una nang makapagpahinga sina JC ay Mulo sa paglilinis ng aircon.
“JC, pagnagpunta rito si Mam Dioscora, ipakilala mo ako ha?’’
“Sige. Pero palagay ko hindi na pupunta rito ‘yun.’’
“Bakit naman?’’
“Di ba kagagaling lang dito nung isang araw.’’
“Sayang.’’
“Bakit?’’
“Baka may bakante sila para sa janitor.’’
Napatango na lang si JC. Hayaan na nga niya si Mulo. Hindi na niya kokontrahin.
At naisip niya, sana nga ay pumunta uli rito sa shop si Mam Dioscora. Sanga ngayon, pumunta!
Itutuloy