Lalaki na nagnakaw ng giniling na karne, nahuli kahit 1,000 kilometers na ang layo sa krimen!

ISANG kakaibang kaso ng paghuli sa isang magnanakaw ang umani ng pansin sa Japan, nang isang lalaki na nagnakaw ng dalawang pack ng giniling na karne sa Sapporo ay natunton ng mga pulis kahit nasa malayong lugar na ito!

Noong Setyembre 17, isang 41-anyos na lalaki ang nagnakaw ng karne sa isang supermarket sa Hokkaido, ngunit nahuli siya ng secu­rity guard. Sa kabila ng pagpigil dito ng security guard, nakatakas ang suspek at nagsimula ang mahaba at masali­muot na proseso ng pagtunton sa kinaroroonan nito.

Sa tulong ng mga malawak na surveillance network ng pulisya, kabilang na ang mga camera sa kalye at mga istasyon ng tren, natunton ang lalaki at nahuli siya sa Chita, Aichi Prefecture noong Disyembre 23— isang lugar na nasa mahigit 1,000 kilometers ang layo mula sa pinagmulan ng krimen.

Ang mabilis at masusing pagmanman ng mga awtoridad sa bawat galaw ng suspek ay nagpapakita ng kahusayan ng sistema ng surveillance sa Japan.

Malaki ang naitulong ng mga CCTV sa bawat kanto at istasyon ng tren, na tumulong sa mga pulis upang tukuyin kung aling mga istasyon at ruta ang tinahak ng suspek.

Sa pamamagitan ng maayos na train system sa Japan, madali nilang nasubaybayan ang oras ng pagbaba ng suspek sa bawat istasyon.

Bagama’t hindi kalakihan ang halaga ng krimen, ipinakita ng mga awtoridad ang dedikasyon nila sa pagpapatupad ng batas at naipakita nila na hindi puwedeng magtago sa batas, gaano man kaliit ang kasalanan.

Ang insidenteng ito ay nagbigay-diin sa kahalagahan ng teknolohiya at ang sistema ng pagpapatrol na ginagamit sa Japan, na nagbibigay ng babala na ang kahit pinakamaliit na krimen ay hindi pinapalampas ng batas.

Nahuli ang lalaki na nagnakaw ng giniling na karne kahit malayo na ang narating nito.