‘PuroKalusugan’ inilunsad ng DOH sa Pangasinan

MANILA, Philippines — Iniulat ng Department of Health (DOH) na daan-daang residente sa Ilocos Region ang nakinabang sa ikalawang “PuroKalusugan” Program na inilunsad nila sa Purok Pocdol, Bayambang, Pangasinan.

Ayon sa DOH-Ilocos Region, umaabot sa 908 residente mula sa naturang komunidad, gayundin mula sa mga kalapit na barangay, ang napagkalooban nila ng health services sa ilalim ng naturang programa, kabilang na ang nutrition services, immunization, oral health, family planning, at screening services para sa TB, HIV, Philippine Package of Essential Non-Communicable (PhilPEN) health risk assessment, cervical at breast cancer.

Namahagi rin umano ng iba’t ibang maintenance medicines para sa mga residente at nagdaos ng Information, Education, and Communication (IEC) sa water, sanitation and hygiene (WASH) at namigay ng kabuuang 60 sako ng fortified rice sa mga buntis, 15 wheelchairs at 14 na tungkod para sa mga  persons with disability (PWD), 50 jerry cans, at 50 Herbal Medicine Access Program (HerbMap) packages para sa senior citizens.

Si DOH Undersecretary for Universal Health Care (UHC) Health Services Cluster for Northern at Central Luzon Maria Rosario S. Vergeire naman ang nagsilbi bilang guest of honor at sumaksi sa naturang aktibidad.

“Ang programang “PuroKalusugan” po ay handog ng ating Kagawaran ng Kalusugan upang magdala ng serbisyong pangkalusugan sa mga iba’t ibang purok ng mga munisipyo. This is also to strengthen primary healthcare in the barangays at the “purok” level,” mensahe ni Vergerie.

Ayon naman kay Regional Director Paula Paz M. Sydiongco, ang naturang programa ay alinsunod sa isa sa mga eight-point action agenda ng DOH na, “Bawat Pilipino Ramdam ang Kalusugan, dahil sa Bagong Pilipinas, Bawat Buhay Mahalaga.”