Resort owner utas sa pamamaril
SARIAYA, Quezon, Philippines — Patay agad ang isang resort owner makaraang pagbabarilin ng limang kalalakihan kamakalawa ng umaga sa Sitio Puntos, Barangay Bignay 1 sa bayang ito.
Ang biktima na nagtamo ng mga tama ng bala ng hindi pa batid na kalibre ng baril sa ibat ibang parte ng katawan ay kinilalang si Teodoro Abdon, 64, mag-asawa at residente ng Barangay Bignay 1.
Sa limang suspek sa pamamaslang sa biktima ay iisa pa lamang ang nahuhuli at kinilalang si alyas Reynante habang tinutugis na sina alyas Jerry, Ryan, Socrates at Ambot.
Ayon kay PLt. Homer De Guzman, Chief investigator, bandang alas-10:30 ng umaga ay papasok na sa compound ng kanyang pag-aaring resort ang biktima nang paulanan ng punglo ni Jerry na noon ay nag-aabang na sa gate kasama ang iba pang suspek.
Nang duguang bumulagta ang biktima ay sinundan pa itong barilin ng ilang beses ng isa pa sa mga salarin upang matiyak na patay na ito.
Nagsilbi umanong look out sina Socrates at Ambot habang isinasagawa ng tatlo nilang kasamahan ang krimen saka nagsitakas.
Nadakip sa follow-up operations si Reynante habang patuloy ang imbestigasyon upang malaman ang motibo ng mga ito sa pamamaslang sa biktima.
- Latest