Konsehal sa Bulacan binaril sa loob ng opisina, nakaligtas
![Konsehal sa Bulacan binaril sa loob ng opisina, nakaligtas](https://media.philstar.com/photos/2024/08/20/4_2024-08-20_22-49-41.jpg)
MALOLOS CITY, Bulacan, Philippines — Himalang nakaligtas sa kamatayan ang isang konsehal ng bayan matapos siyang barilin ng isa sa dalawang ‘di pa nakikilalang suspek na pumasok sa kanyang tanggapan at nagkunwaring uupa ng stall sa loob ng commercial building sa Brgy. Camias, San Miguel, Bulacan, kamakalawa ng umaga.
Kinilala ni OIC Bulacan Provincial Director Col. Satur Ediong, ang biktima na si San Miguel Municipal Councilor Richard dela Cruz.
Lumalabas sa inisyal na imbestigasyon na dakong alas-10:04 ng umaga nang magsadya ang isa sa mga suspek sa commercial building ng biktima at nagpanggap na uupa sa isa sa mga stalls ng konsehal sa Brgy. Camias.
Habang nag-uusap ang dalawa, binaril ng isa sa mga suspek si Dela Cruz ngunit hindi ito tinamaan at nakaiwas ang biktima sa pag-atake habang agad namang sumakay ang mga suspek sa kanilang kulay orange na Yamaha Mio na motorsiklo at tumakas.
Nag-flash alarm ang mga operatiba ng San Miguel Police laban sa mga suspek at nagsagawa ng follow-up operations habang hiniling sa Bulacan Police Forensic Unit na iproseso ang pinangyarihan ng krimen.
- Latest