Army detachment, niratrat ng terorista: Sundalo patay, kasama sugatan

COTABATO CITY, Philippines — Patay ang isang sundalo habang sugatan naman ang isang kasamahan sa  pag-atake ng mga teroristang Dawlah Islamiya sa kanilang detachment sa Barangay Pagatin 1 sa Shariff Saydona Mustapha, Maguin­danao del Sur nitong Sabado ng tanghali.

Kinilala ng Shariff Saydona Mustapha Municipal Police Station at Police Regional Office-Bangsamoro Autonomous Region ang nasawing biktima na si Private 1st Class Rosendo Gannaban ng 99th Infantry Battalion at pagkasugat ni Private First Class Lexter Lizardo.

Sa inisyal na ulat ng mga barangay officials sa Pagatin 1, pinalibutan ng mga teroristang pinamumunuan ni Ben Harris Salamat ang detachment nila Gannaban at pinaputukan ng M14 at M16 assault rifles, kaya nagkapalitan ng putok na nagdulot din ng takot sa mga pamilyang Moro na nakatira sa kapaligiran.

Ang Dawlah Islamiya at kaalyadong Bangsamoro Islamic Freedom Fighters ay parehong kilala sa pagpapalaganap ng galit sa mga hindi Muslim at pambobomba ng mga establisyemento at mga sasakyang pampubliko na ayaw magbigay ng “protection” money ang mga may-ari.

Nakatakdang ihatid sa pamilya ang labi  ni Gannaban sa Barangay Divisoria, Enrile, Cagayan.