Mag-utol, binaril sa road rage sa Laguna

MANILA, Philippines — Sugatan ang magkapatid na pasahero ng jeepney matapos barilin ng isa sa mga sakay ng motorsiklo na kanilang nakaalitan dahil sa trapiko nitong Linggo sa Multiland Subdivision, Brgy. Sala, Cabuyao City, Laguna, kamaka­lawa ng gabi.

Kapwa nagtamo ng tama ng bala ng baril sa paa at ginagamot sa ospital ang magkapatid na biktimang sina Archie at Christian Rebano.

Ayon sa report ng Cabuyao City Police, dakong alas-10:30 ng gabi nang makasagutan ng magkapatid na Rebano ang dalawang lalaking sakay ng motorsiklo dahil sa hindi pagkakaunawaan sa trapiko.

Nauwi sa suntukan ng apat ang pangyayari hanggang sa dali-daling umalis ang isa sa mga suspek sakay ng motorsiklo. Ilang minuto lamang ay bumalik siya bitbit na ang isang maiksing baril at magkasunod na pinaputukan ang magkapatid habang lulan ng jeep.

Agad ring tumakas ang mga suspek na ang isa ay kinilalang si Intad matapos ang pamamaril samantalang isinugod sa ospital ang dalawang biktima.