COTABATO CITY, Philippines — Tatlo ang agad na nasawi habang tatlong iba pa ang malubha sanhi ng pagbaliktad ng kanilang sinasakyang dump truck sa isang liblib na barangay sa bayan ng New Bataan sa Davao de Oro nitong hapon ng Martes.
Sa ulat nitong Miyerkules ng New Bataan Municipal Police Station, nagulungan ng dump truck ang mga sakay nitong mga namatay na sina Marjin Alagon, Peo Mesiona at Samuel Painandos nang ito ay mawalan ng preno, bumaliktad at gumulong ng ilang beses.
Nadiskarel ang dump truck habang pinipilit ng driver nitong itabi sana nang mahalatang wala na itong preno.
Kabilang ang driver nito sa tatlong mga nasaktan sa aksidente na naisugod naman ng mga emergency responders ng New Bataan local government sa isang hospital.
Nangako ang New Bataan Municipal Disaster Risk Reduction and Management Office ng ayuda para sa mga na-ospital na mga sakay ng dump truck ganun din sa mga pamilya ng tatlong nasawi sa naturang aksidente.