Nanay, 3 anak sugatan sa kidlat
SAN ANDRES, Quezon, Philippines — Sugatan ang 43-anyos na ginang at tatlo niyang anak na mga babae makaraang tamaan ng kidlat habang nasa loob ng kanilang bahay sa Sitio Recudo, Barangay Talisay sa bayang ito, kamakalawa ng gabi.
Kinilala ng pulisya ang mga biktima na sina Marivic Balmoria, at mga anak na sina Annarose, 19, may live in partner, Grade 11 student; Annabel, 18, Grade 12 student, at Annamarie, 16, Grade 11 student.
Ayon sa pulisya, habang nakaupo ang mga biktima kasama ang kanilang amang si Reynaldo sa harapan ng kanilang mesa upang maghapunan nang biglang mag-brown out.
Inutusan umano ni Marivic ang kanyang mga anak na buhayin ang ilaw ng kanilang mga cellphone at nang kukunin na nito ang mga pagkain ay biglang kumidlat at tinamaan siya sa likod, gayundin ang kanyang mga anak.
Masuwerte namang hindi natamaan ng kidlat si Reynaldo na agad nakahingi ng tulong sa mga kapitbahay upang dalhin sa Rural Health Clinic ang kanyang mag-iina.
- Latest
