BUSTOS, Bulacan, Philippines — Patay ang isang binatilyo matapos tamaan ng kidlat habang lumalangoy sa Bustos Dam sa Barangay Tibagan ng nasabing bayan kamakalawa ng umaga.
Sa ulat kay Col. Charlie A. Cabradilla, acting Bulacan police director ni Maj. Leopoldo L. Estorque Jr., Bustos police chief, kinilala ang biktima na si Reniel Villante Buela ng Barangay Bintog, Plaridel, Bulacan.
Lumalabas sa inisyal na imbestigasyon ng Bustos Police na habang lumalangoy ang biktima sa tubig ng Bustos Dam dakong alas-9:30 ng umaga kasama ang kanyang mga kaanak, bumuhos ang malakas na ulan na may paminsan-minsang pagkidlat.
Sinabi ni Remedios Mendoza-Villante, lola ng biktima, sa pulisya na tinamaan ng kidlat ang biktima habang bumubuhos ang malakas na ulan.
Agad na dinala ang biktima sa Bustos Community Hospital sa Barangay Poblacion para magamot ngunit idineklarang dead-on-arrival ng attending physician na si Dr. Ronald Lapuz.
Nagtamo ng malalim na sugat sa ulo ang biktima dahil sa tama ng kidlat.