CAVITE, Philippines — Napisak ang isang lalaki matapos araruhin ng isang trailer truck habang nagbibisikleta sa kahabaan ng Centennial Road Intersection, Brgy. Magdalo Potol sa bayan ng Kawit ng lalawigang ito, kamakalawa ng gabi.
Hindi na naisalba pa ang biktimang nakilalang si Ronnie Abad, 31-anyos, residente ng Brgy. Alapan 2A, Imus City, Cavite.
Hawak naman ng pulisya ang driver ng naturang truck na si Aldwin Masong Ruiz, 28-anyos, residente ng Centro Longos, Brgy. Zapote 5, Bacoor City.
Sa imbestigasyon ni Pat. Troadio Balitaosan, may hawak ng kaso, alas-9 ng gabi habang nagbibisikleta ang biktima sa Centennial Road Intersection sa Brgy. Magdalo Potol, nang mahagip ng trailer truck na minamaneho ng suspek.
Ayon sa driver, hindi niya napansin ang biktima at bago pa siya nakapagpreno ay nahagip na niya ito.
Sa tindi ng pinsala, agad na nasawi ang biktima matapos magulungan at mapuruhan sa ulo.