PAMPANGA , Philippines - Umaabot sa 13 preso na may mga kasong droga ang nakapuga sa kampo ng pulisya sa San Fernando City, Pampanga kahapon. Ayon sa tagapagsalita ng Philippine Drug Enforcement Agency na si Derrick Arnold Carreon, inaalam nila kung saan nakuha ng mga preso ang ginamit na maliit na lagare sa pagwasak ng rehas na bakal ng selda. Magugunita na nakapuga rin ang 23 preso mula sa Lanao del Sur provincial jail sa Marawi City makaraang salakayin ng mga armadong Maute Group ang nasabing kulungan noong Agosto 2016. Maging ang district prison sa North Cotabato na may ilang metro ang layo sa Kidapawan City ay sinalakay din ng armadong grupo kung saan aabot sa 150 preso ang nakapuga habang isa sa mga prison guard ang napatay noong Enero 2017.