Misis pinugutan ng lover

CAVITE, Philippines – Brutal na kamatayan ang sinapit ng 43-anyos na misis matapos itong pugutan ng kanyang lover sa palikuran ng beach resort sa Barangay Iba­yong Silangan, bayan ng Naic, Cavite kamakalawa ng gabi.

Natagpuan sa ilog ang ulo ng biktimang si Grace Ilagan, collector ng pri­badong kompanya, may asawa, at nakatira sa Brgy. Latoria sa nabanggit na bayan.

Nasakote naman sa follow-up operation ng pulisya ang suspek na si Edgardo Poblete, 55, may asawa at nakatira sa Sitio Sampalukan sa nasabing barangay.

Sa ulat ni PO2 Ryan Espiritu na isinumite sa Camp Pantaleon Garcia sa Imus City, magkasamang nag-check in sa Cottage 1 ng Aroma Beach Resort ang mag-lover bandang alas-6:45 ng gabi.

Gayunman, bandang alas-9 ng gabi ay namataan ng room boy na lumabas ng cottage ang suspek na may bitbit na bag at supot.

Nakita rin ng room boy na may inihagis sa ilog ang suspek bago lumakad palabas ng resort kaya tinungo ng room boy ang cottage na inakupahan ng dalawa para linisin.

Kinuha ng room boy ang susi dahil naka-lock ang cottage at nang buksan ay lumantad ang duguang katawan ng biktima na nakahandusay sa palikuran.

Kaagad na rumesponde ang pulisya sa crime scene matapos ipaalam ng pamunuan ng nasabing baech resort.

Nasakote naman ang suspek sa bisinidad ng Barangay Munting Mapino kahapon ng madaling araw.