MANILA, Philippines – Nauwi sa trahedya ang masayang outing ng magkakaibigan nang isa sa kanila ang nasawi matapos na hampasin at lamunin ng malaking alon sa isang beach resort sa Brgy. Malapad, kamakalawa ng tanghali.
Idineklarang dead-on-arrival sa Claro M. Recto District Hospital sanhi ng pagkalunod ang biktimang si Joy dela Cruz, dalaga, ng Maybangkal Parang Rizal.
Sa ulat ng pulisya, kumuha ng cottage alas-10:30 ng umaga sa D’Aplaya Beach Resort ang biktima at tatlo pang kasamahan upang ipagdiwang ang birthday ng kaibigan nilang overseas Filipino worker.
Nagpaalam umano ang biktima sa mga kaibigan na maglalakad lamang sa tabing dagat subalit sinabihan siya na huwag lumayo dahil malakas ang ulan gayundin ang hampas ng alon sa dalampasigan. Maya-maya ay nakita na lamang ang biktima na hinampas ng malakas na alon patungo sa batuhan hanggang sa mawalan ng malay at tuluyang lumubog.
Agad na rumesponde ang mga kawani ng MDDRMC at narekober ang biktima subalit nalagutan rin siya ng hininga kinalaunan.