Pulis utas sa ambush

LEGAZPI CITY, Albay, Philippines – Napatay ang beteranong imbestigador ng pulisya matapos itong tambangan ng mga rebeldeng New People’s Army kamakalawa ng umaga sa Barangay Amomokpok, bayan ng Ragay, Camarines Sur. Idineklarang patay sa Ragay Rural Health Unit ang biktimang si SPO2 Julieto Egay Mondego Jr., nakatalaga sa himpilan ng pulisya sa nasabing bayan. Base sa police report na nakarating sa Camp Simeon Ola, pauwi na ang biktimang nagmomotorsiklo mula sa himpilan ng pulisya nang tambangan ng NPA rebs bandang alas-10:35 ng umaga. Nabatid na inimbitahan ng biktima ang mga kabarong pulis sa kanyang bahay para sa pananghalian dahil sa kaarawan nito. Kinomander ng gunmen ang motorsiklo ng biktima para makatakas habang narekober sa crime scene ang mga basyo ng bala ng cal. 9mm pistol at cal. 45 pistol.