Pastora nilamon ng apoy

NORTH COTABATO, Philippines – Maagang sinalubong ni kamatayan ang isang pastora matapos itong makulong sa nasunog na simbahan sa Purok-6, Barangay 37-D sa Trading Boulevard, Davao City kamakalawa ng gabi. Kinilala ng pulisya ang biktima na si Nova Nuez, 25, youth pastor sa Ocean Life Ministries, at nakatira  sa bayan ng La Paz, Agusan del Sur. Sa inisyal na ulat na nakarating sa Camp Crame, naganap ang sunog bandang alas-11 ng gabi matapos mapabayaan ni Pastor Lo Franco ang dalawang kandilang nakasindi sa loob ng simbahan matapos ang brownout. Sinasabing naghapunan sa labas ng simbahan si Lo Franco kung saan pagbalik nito ay tinutupok ng apoy ang simbahan. Hindi nakalabas sa palikuran ang biktima dahil walang fire exit ang nasabing simbahan kaya madaling kumalat ang apoy.