2-anyos naabo sa sunog
QUEZON, Philippines – Namatay ang 2-anyos na nene makaraang masunog ang 23 kabahayan at establisyemento sa Barangay Masipag sa bayan ng Macalelon, Quezon kamakalawa ng hapon.
Sa ulat ng Macalelon BFP, kinilala ang biktima na si Agatha Baluyot na natagpuang halos abo na ang buong katawan matapos na sumiklab ang sunog na umabot sa tatlong oras.
Sa inisyal na imbestigasyon, dakong ala-1:40 ng hapon ng nagsimula ang sunog sa kisame ng bagong gawang palengke sa nasabing bayan.
Dahil sa init ng panahon ay mabilis na kumalat ang apoy sa mga kalapit na establisimento at kabahayan.
Bandang alas-4:30 na ng hapon nang maapula ang sunog matapos rumesponde ang mga bumbero mula sa mga kalapit na bayan sa Bondoc Peninsula at bayan ng Gumaca, Quezon.
Aabot naman sa 43 pamilya ang naapektuhan ng sunog na tumupok sa P5 milyong halaga ng ari-arian habang patuloy naman ang imbestigasyon.
- Latest
