Batangas, Philippines – Patay ang isang lalaki habang anim katao ang sugatan nang araruhin ng isang shuttle bus ang anim na sasakyan sa bayan ng Malvar kahapon ng umaga.
Kinilala ni Sr. Insp. Alberto Fabregas, hepe ng Malvar Police station ang nasawi na si Manuelito Buizon, ng San Jose, Del Monte, Bulacan. Siya ay dead on the spot.
Ang mga sugatan ay sina Ronie Manalo, Shiela Bunon, mga residente ng Malvar; Gilbert Flores, Ariston Tana, Enrique Villamer at Rosemarie dela Pena pawang mga residente naman ng Sto. Tomas, Batangas at pawang ginagamot sa CP Reyes Hospital at Mercado Hospital sa Tanauan City.
Ayon sa report, binabagtas ng FS Shuttle bus ang kahabaan ng National Highway nang mawalan ng preno at araruhin ang dalawang motorsiklo na ang isa ay minamaneho ng nasawi, isang Nissan Urban van, dalawang kotseng Toyota at isang Suzuki van pagsapit sa Brgy. Luta, Norte bandang alas-11:50 ng umaga.
Mabilis na tumakas ang driver ng bus na si Raymond Maranan, 32, ng Brgy. Matala, Ibaan pero nahuli din siya ng mga awtoridad sa kanyang bahay. Siya ay nahaharap sa kasong reckless imprudence resulting to homicide and multiple physical injuries.