ANGELES CITY, Pampanga, Philippines – Napaslang ang 31-anyos na kontratista matapos itong pagbabarilin ng riding-in-tandem assassins sa panulukan ng Victoria Street at Loyola Street sa Saint Ignatius 2, Barangay Pandan sa Angeles City, Pampanga kahapon ng umaga. Sa inisyal na police report na nakarating kay P/Supt. Eden T. Ugale, Angeles City PNP director, kinilala ang biktima na si Rodel Soriano y Dela Cruz ng Ruby Street sa Phase 2 Saint Ignatius Subdivision sa nabanggit na barangay. Lumilitaw sa imbetigasyon na nagmomotorsiklo ang biktima patungo sa kanyang trabaho nang sundan at pagbabarilin ng bandang alas-7 ng umaga. Ayon sa isang saksi sa krimen, may kinuhang bag sa compartment ng motorsiklo ng biktima bago tumakas ang gunman na lulan ng motorsiklo. Narekober ng mga tauhan ni P/Chief Insp. Maria Elvira Bautista sa crime scene ang walong basyo ng bala ng cal. 45 pistol habang patuloy naman ang imbestigasyon.