TUGUEGARAO CITY, Philippines – Kaysa harapin sa husgado ang kaso niyang panghahalay sa menor-de-edad, nagpasyang wakasan ng isang 47-anyos na mister ang kanyang buhay sa pamamagitan nang pagbibigti sa loob ng kanilang bahay sa Brgy. Ignacio Jurado, Lasam, Cagayan kamakalawa. Sa ulat na tinanggap ni C/Insp. Ramil Alipio, hepe ng Lasam PNP, napansin ng mga kaanak at kapitbahay ang biktimang si Edgar Ulivas nang pagka-balisa at laging nawawala sa sarili mula nang matanggap ang resolusyon ng piskalya kaugnay sa kasong isinampa laban sa kanya na act of lascivousness na may kaugnayan sa RA 7610 noong nakaraang linggo. Natagpuan na lamang ng kanyang kapatid na si Erinio na nakabitin sa kisame ng kanyang kuwarto na lawit pa ang dila ng biktima dakong alas-9:00 ng umaga.