BATANGAS, Philippines - – Dalawa-katao ang napaslang sa naganap na magkahiwalay na pamamaril sa bayan ng San Juan, Batangas kamakalawa. Sa ulat na nakarating kay P/Senior Supt. Omega Jireh Fidel, Batangas PNP director, kinilala ang mga napatay na sina Manolo Briones ng Barangay Mabalanoy; at Jojet Gunio, 39, ng Barangay Bulsa. Bandang alas-9:30 ng umaga nang nanggugulo si Briones na may hawak na itak kung saan tinangkang payapain ng barangay tanod na si Melchor Baña. Gayon pa man, tinangkang tagain si Baña kaya napilitang barilin ang nagwawalang si Briones. Samantala, napatay naman si Gunio matapos barilin ng suspek na si Alberto Malapitan nang mauwi sa mainitang pagtatalo na may kaugnayan sa lupa ang kanilang usapan habang nakikipag-inuman sa Barangay Bulsa bandang alas 6:10 ng gabi. Kasalukuyang pinaghahanap ng pulisya ang mga suspek na sina Malapitan at Baña.