BULACAN , Philippines – Napatay ang 29-anyos na driver ng pribadong kompanya na may dalang malaking halaga na sinasabing patungong banko matapos itong pagbabarilin ng apat na lalaking holdaper sa Barangay Mahabang Parang, bayan ng Sta. Maria, Bulacan kahapon ng hapon.
Apat na tama ng bala ng cal. 9mm pistol ang tumapos sa buhay ni Anthony Lapore, tubong Negros Occidental at stay-in driver ng S-Flame Gas Refilling Corporation sa nasabing barangay.
Sa inisyal na pagsisiyasat ni SPO1 Daniel Ortega Jr., lulan ng Mitsubishi DeÂlica (RCJ 854) ang biktimang patungong banko sa Barangay Poblacion para idiposito ang P437,000 kinita ng nasabing kumpanya nang harangin dalawang motorsiklo na lulan ng apat na armadong lalaki.
Sa halip na huminto ay pinaharurot ng biktima ang minamanehong van kaya sunud-sunod na pinutukan siya ng apat na lalaki.
Dito na tinamaan sa ulo at katawan ang biktima kaya napahinto sa poste ng MeÂralco kung saan may ilang metro ang layo sa nabanggit na kompanya.
Kasunod nito, nilapitan ng mga holdaper ang biktima saka tinangay ang bag na naglalaman ng malaking halaga.
Sinisilip ng pulisya ang anggulong ‘inside job’ ang pangunahing motibo sa krimen.