MANILA, Philippines - Nalibing nang buhay ang apat na bata matapos lamunin ng landslide sa naganap na insidente sa Purok 4, Barangay Sayao sa bayan ng Kabasalan, Zamboanga Sibugay kamakalawa ng hapon.
Kinilala ang mga biktima na sina Fatima Maghanoy, 12; Eugene Maghanoy, 9; Sherlyn Maghanoy, 7; at si Eziquel Meziah Maghanoy, 3, pawang nakatira sa nasabing bayan.
Sa ulat ni P/Chief Inspector Ariel Huesca na isinumite sa Camp Crame naitala ang insidente bandang alas-2:30 ng hapon kung saan nagpapahinga ang mga bata sa inabandonang bahay na pag-aari ni Semion Buray matapos abutin ng malakas na buhos ng ulan.
Dito na biglang dumagundong ng malakas at kasunod nito ay natabunan nang gumuhong bundok ang bahay na kinaroroonan ng mga bata.
Nagsisigaw pa ang mga magulang ng mga biktima para palikasin ang mga anak pero sa isang iglap ay tuluyang nilamon ng lupa ang bahay na sinilungan ng mga ito.
Sa kasalukuyan ay patuloy naman ang paghahanap ng search and rescue team sa mga biktima na hindi pa rin natatagpuan.