TUGUEGARAO CITY, Philippines – Napatay ang 54-anyos na kuya na sinasabing tinangkang saktan ang kanyang ina matapos saksakin ng nakababatang kapatid sa loob ng kanilang tahanan sa Barangay Babanuang sa bayan ng San Manuel, Isabela kamakalawa.

Lumalabas sa imbestigasyon ng pulisya na nanonood ng telebisyon ang nakababatang utol na si Edgar Castillo, kasama ang kanilang 75-anyos na ina, at iba pang kaanak nang dumating ang biktimang si Carlito Castillo na lango sa alak.

Nagwala ang biktima matapos hindi siya pinansin ng mga kaanak na abala sa panonood ng telebisyon kaya kumuha ito ng patalim at tinangkaang saksakin ang sariling ina.

Nagdilim naman ang paningin ng suspek sa inasal ng kanyang kuya kaya inagaw ang kutsilyo saka pinagsasaksak hanggang mapatay ang kanyang utol.