Altas pinigil ang pagbulusok
MANILA, Philippines — Makakatulog na ngayon nang mahimbing si coach Olsen Racela.
Tinapos ng University of Perpetual Help System DALTA ang apat na sunod na kamalasan matapos gibain ang Colegio de San Juan de Letran, 71-61, sa second round ng NCAA Season 100 men’s basketball kahapon sa FilOil EcoOil Centre sa San Juan City.
Itinaas ng Altas ang kanilang baraha sa 5-6 at inihulog ang Knights sa 6-5 marka kasama ang two-game losing skid.
Pinamunuan ni Christian Pagaran ang Perpetual sa kanyang 19 points, 5 rebounds at 2 assists, habang may 15 markers si rookie Mark Gojo Cruz.
“Sabi kasi ni coach Olsen na sa Letran kasi nagsimula ‘yung mga talo namin kaya kailangan mag-bounce back kami,” ani Pagaran.
Binanderahan ni Jimboy Estrada ang Letran sa kanyang 14 points at 10 assists.
Kaagad na lumayo ang Altas sa 22-13 mula sa three-point shot ni Pagaran sa dulo ng first period patungo sa pagtatayo ng 38-24 abante sa second quarter.
Tuluyan nang nakabitaw sa laro ang Knights nang maiwanan sa 48-61 sa 7:42 minuto ng final canto.
Sa ikalawang laro, pinatumba ng College of St. Benilde ang San Sebastian College-Recoletos, 91-85.
Pinatibay ng Blazers ang kanilang kapit sa liderato bitbit ang 8-2 record.
- Latest
