Bossing nilasing ang Beermen
MANILA, Philippines — Binuhay ng Blackwater ang tsansa sa quarterfinals matapos lasingin ang San Miguel, 111-94, sa PBA Season 49 Governors’ Cup kahapon sa Ninoy Aquino Stadium sa Malate, Manila.
Winakasan ng Bossing ang dalawang sunod na kamalasan para itaas ang baraha sa 4-5 katabla ang NLEX Road Warriors na kaagaw nila sa No. 4 spot sa Group B.
Nagkuwintas si import George King ng 49 points at 11 rebounds.
Ito ang ikalawang dikit na kabiguan ng Beermen para sa 6-4 kartada papasok sa crossover quarterfinals kung saan ang top four teams sa Group A at B ang maghaharap-harap.
Sinamantala ng Blackwater ang hindi paglalaro ni SMB import Jordan Adams na nagkaroon ng strained right hamstring sa kanilang 112-122 kabiguan sa Rain or Shine noong Huwebes.
Kinuha ng Bossing ang 41-28 kalamangan sa 8:34 ng second period mula sa basket ni Troy Rosario bago nakakapit ang Beermen sa halftime, 43-52.
Sa third quarter ay muling nakalayo ang Blackwater sa likod ni King para sa 13-point lead, 85-72, sa San Miguel papunta sa final canto.
Bumanat ang Bossing ng isang 22-10 atake sa fourth period para tuluyan nang iwanan ang Beermen sa 107-82.
Pinamunuan ni eight-time PBA MVP June Mar Fajardo ang San Miguel sa kanyang 23 points kasunod ang 21 markers ni CJ Perez.
- Latest