Cebu-USJR, Pangasinan magtutuos sa Born 2006 division finale ng PSL National Finals

MANILA, Philippines – Pag-aagawan ng Cebu-USJR at Pangasinan ang korona ng Born 2006 division ng PSL National Finals ngayon sa Filoil-EcoOil Centre sa San Juan City.

Ito ay matapos talunin ng Cebu-USJR ang Misamis Oriental, 71-66, at lusutan ng Pangasinan ang Manila-UST, 76-74, sa kani-kanilang semifinals duel patungo sa titular showdown nila.

Bumanat si Jan Vince Oringo ng 19 points para sa Cebu-USJR, habang may 14 markers si Clark Candia.

Isinalpak naman ni dating Batang Gilas player Jeremy Godoy ang isang krusyal na floater para sa 75-74 abante ng Pangasinan sa huling limang segundo ng laro.

Kapos ang tangkang 3-point shot ni Charles Esteban sa huling posesyon ng Manila-UST.

Ang free throw ni Jairus Armendez sa natitirang dalawang segundo ang sumelyo sa panalo ng Pangasinan.

Bukod sa kampeonato, hangad din ng Cebu at Pangasinan na maging kinatawan ng Pilipinas sa parating na Global Championship Challenge sa Hulyo 15 sa Smart Araneta Coliseum.