MANILA, Philippines — May 18 mahuhusay na tankers ang ginawaran ng Most Outstanding Swimmer (MOS) awards sa Swim League Philippines Mindanao Swim Series na ginanap sa Gov. Douglas Ra. Cagas Sports Complex and Business Center sa Matti, Digos City sa Davao Del Sur.
Nanguna sa listahan si Rhoiden Adrianne na umani ng limang gintong medalya sa 50m butterfly, 50m breaststroke, 100m breaststroke, 50m freestyle at 200m individual medley sa event na bahagi ng national tryouts para mapili ang miyembro ng Philippine Team na isasabak sa Dubai International meet.
Layunin din ng SLP na makatuklas ng mga talentong isasabak sa Southeast Asian Games, Asian Games at Olympic Games sa mga susunod na taon.
Nakahirit din ng MOS awards sina John Bahian, Francis Rio Espiritu, Nathan Jae Galaez, Xhierwyn Helian Cuizon, Ryle Caleb Luz Roque, Prince John Namoc, Harris Martin Anzures, Carl Henry Guirigay, Hannah Katharina Schneider, Celestine Marriet Callejo, Angel Rae Santiago, Georgia Summer Paneiro, Lexi Kizz Hinampas, Lara Zamora, Rianne Chaela Rito,Eunice Adrianne Tabada, at Princess Reychelle Denuna.
“We’re so glad and happy sa nakita nating pagpupursige ng mga batang swimmers na maipakita ang kanilang talent. Gusto nilang patunayan na karapat-dapat sila sa National Team in the future. Susuyurin natin ang Visayas at Manila,” ani SLP president Fred Ancheta.
Itinanghal na overall champion ang Dolphin Angels Swimming Club na hawak ni veteran coach Izzabelle Octavio.
Inilampaso ng Dolphin Angels Swimming Club ang Davnor Blu Marlins ni coach Amil Cabatuan na nagkasya lamang sa ikalawang puwesto.
Pumangatlo ang Mighty Dolphins Swim Team kasunod ang Sweat Dolphins Swim Team.