MANILA, Philippines — Inilatag ni Jeffrey De Luna ang matikas na ratsada upang masungkit ang dalawang korona — 9-Ball at 10-Ball divisions —ng 1st Annual Meucci Classic 10-Ball Division na ginanap sa Racks Billiards Sports Bar and Pizzeria sa Sanford, Florida.
Inilabas ni De Luna ang husay nito sa 9-Ball nang pataubin si BJ Ussery ng Amerika sa finals para maibulsa ang $3,500 top purse.
Nagkasya lamang sa $1,500 konsolasyon si Ussery.
Muling umarangkada si De Luna sa 10-Ball nang gapiin nito ang kababayang si Roberto Gomez sa all-Filipino championship round para makuha ang ikalawang sunod na korona.
Napasakamay ni De Luna ang tumataginting na $6,000 premyo habang hindi naman uuwing luhaan si Gomez dahil nakamit nito ang $3,500 konsolasyon.
Nakumpleto ni dating world champion Dennis Orcollo ang 1-2-3 finish ng Pinoy cue masters matapos masikwat ang third place para sa $2,500 konsolasyon.