MANILA, Philippines — Amin ‘to!--Tan Inilarawan ni rookie coach Bonnie Tan na isang kapalaran para sa Letran Knights na makamit ang kanilang ika-18 titulo sa Season 95 NCAA men’s basketball tournament.
Sinabi ni coach Tan na tumapos lamang sila sa ikatlong puwesto (12-6) pagkatapos ng double-round elimination habang winalis ng 22-time champion San Beda Red Lions ang elims.
“Playing a team like San Beda, 18-0, defending champion alam nating mahirap pero again walang imposible sabi ko sa mga players. We have a lot of trials during the whole season naman. Lahat ng mga laban sa stepladder hindi naman ibinigay sa atin ng basta-basta. Ang mga panalo nun carried us, yung momentum, until this series,” pahayag ni coach Tan na nakamit ang championship sa unang taon pa lamang bilang head coach.
Dumaan sa butas ng karayom ang Knights sa stepladder semis bago makarating sa best-of-three Finals.
Ngunit pinatunayan ng Knights na mali ang kanilang mga ‘doubters’ sa pamamagitan ng 81-79 panalo sa deciding Game 3 upang putulin na ang mahabang tatlong taong paghahari ng Mendiola-based San Beda.