Laro Ngayon
12:45 p.m. UST vs FEU (3rd place V-League)
3 p.m. NCBA vs EAC
(3rd place Spikers Turf)
MANILA, Philippines - Agawan sa mahalagang 1-0 kalamangan ang mangyayari sa pagitan ng FEU Tamaraws at UST Tigresses sa pagsisimula ng Shakey’s V-League Season 12 Collegiate Conference ngayon sa The Arena sa San Juan City.
Sa ganap na alas-12:45 ng hapon magsisimula ang aksyon at ito ay susundan ng pagtututuos ng NCBA Wildcats at Emilio Aguinaldo College Generals sa battle-for-third sa Spikers’ Turf sa alas-3 ng hapon.
Walang itulak-kabigin sa FEU at UST dahil pareho silang maghahangad ng magandang pagtatapos sa di produktibong kampanya sa liga.
Ang Lady Tamaraws ay ang nagdedepensang kampeon pero hindi nakaporma ang koponan sa NU, ang tinalo para sa kampeonato noong nakaraang taon, sa pamamagitan ng 2-0 sweep sa semifinals.
Sa kabilang banda, nais ng Tigresses na maibangon ang puri matapos ilampaso ng Ateneo sa straight sets sa ikatlo at huling laro sa Final Four.
Bukas ay iinit pa ang aksyon sa ligang inorganisa ng Sports Vision katuwang ang Shakey’s at handog ng PLDT Home Ultera dahil magkukrus na ang landas ng Ateneo Lady Eagles at NU Lady Bulldogs sa Game One ng V-League Finals.