Camaso nagbida sa Judiciary

Laro sa Linggo

(Pasig Sports Center)

2:30 p.m. DOJ vs Congress-LGU

4 p.m. MMDA vs AFP

5:30 p.m. Judiciary vs PNP

MANILA, Philippines - Mas nakitaan ng init ng paglalaro ang Judiciary tungo sa 103-85 tagumpay sa PhilHealth at manatiling nasa ikalawang puwesto sa idinaos na 1st UNTV Cup noong Linggo sa Yna­res Sports Arena sa Pasig City.

Ang 6’6 center na si Don Camaso ay nagpasabog ng 24 puntos bukod sa 15 rebounds at 3 steals habang sina John Hall, Ariel Capus, Julius Caesar Rabino at Jose Midas Marquez ay nagsanib sa 57 puntos upang makapagdomina ang Judiciary sa kabuuan ng labanan tungo sa ikatlong sunod na panalo matapos ang apat na laro.

“Sinabi ko lamang sa mga teammates ko na hin­di kami dapat mag-relax. Marami pang mabibigat na kalaban kaya’t mahirap pang magsalita sa chance namin dito sa liga. Basta one game at a time lang kami,” ani ng 40-anyos ex-PBA player na si Camaso.

Nasayang ang 31 puntos ni Carlo Capati para sa PhilHealth na bumaba sa 2-2 baraha at nalagay sa ikaapat na puwesto.

Ang Metro Manila De­velopment Authority (MMDA) ang nasa ikatlong puwesto nang kalusin ang Department of Justice (DOJ), 108-72, para sa 2-1 baraha.

Si Johnson Pangilinan ay may 15 puntos para sa balanseng pag-atake ng MMDA at ipalasap sa DOJ ang ikatlong sunod na kabiguan sa pitong koponang liga na inorganisa ng Breakthrough and Milestones Production Interna­tional sa pamumuno ni Chairman at CEO Daniel Razon.

Nakitaan din ng init ang Armed Forces of the Philippines (AFP) para sa 110-83 pagsibak sa Congress-LGU sa ikatlong laro.