Bago labanan si Pacquiao Marquez puntirya si Bradley

MANILA, Philippines - Maliban sa posibleng pakikipagharap kay Filipino world eight-division champion Manny Pacquiao sa pang-limang pagkaka­taon, tinitingnan din ni Juan Manuel Marquez ang pag­hahamon niya kay world welterweight titlist Timothy Bradley, Jr.

Ito ang inihayag ni Mar­quez (55-6-1, 40 KOs) matapos talunin ni Bradley (30-0-0, 12 KOs) si Russian challenger Ruslan Provodnikov (22-2-0, 15 KOs), naging sparmate ni Pacquiao (54-5-2, 38 KOs), noong Linggo sa Home Depot Center sa Carson, California.

“Of course, going after the WBO title would be a possibility,” wika ng 39-an­yos na si Marquez, isang world four-division king, sa koronang suot ni Bradley. “Why not go after a fifth title.”

Ang nasabing WBO belt ni Bradley ay kanyang inagaw sa 34-anyos na si Pacquiao mula sa kontrobersyal na split decision noong Hunyo 9, 2012.

Hanggang ngayon ay wala pang desisyon si Marquez kung lalabanan si Pacquiao sa pang-limang pagkakataon ngayong taon.

“If we continue in boxing, of course I would be thinking about winning a fifth championship,” ani Marquez sa kagustuhang hamunin si Bradley. “I have not decided my future. For now I’m focu­sed on my family.”

Ang planong pang-li­mang paghaharap nina Pacquiao at Marquez ay ina­asahang pag-uusapan sa pagharap-harap nila sa Abril 6 sa Macau.

Nauna nang sinabi ni Bob Arum ng Top Rank Promotions na magkikita sina Pacquiao at Marquez sa Ma­cau para panoorin ang pro debut ni Chinese two-time Olympic Games gold medal winner Zou Shiming kontra kay Mexican Eleazar Valenzuela (2-1-2, 1 KO) sa isang four-round flyweight bout sa Venetian’s Cotai Arena.