Beijing, magho-host ng marathon na may mga robot na kalahok!

Sa darating na Abril, magsasama sa iisang karera ang libu-libong tao at dose-dosenang robot sa isang half-marathon na gaganapin sa Beijing Economic-Technological Development Area. Ang pambihirang kum­petisyon na ito ay magtatampok ng mga makabagong bipedal robots mula sa mga kilalang kompanya tulad ng Tesla, Boston Dyna­mics at 1X.

Tinatayang 12,000 katao ang kalahok sa marathon. Samantala, ang mga robot naman ay kailangang may hitsurang hango sa tao, may taas na 0.5 hanggang 2 meters, at kayang tumakbo o lumakad gamit ang dalawang paa. Magkakaroon ng premyong salapi para sa mga mananalo—tao man o robot—depende sa kanilang magiging performance.

Bagaman kapansin-pansin ang pag-usad ng teknolohiya sa robotics, sinasabi ng mga eksperto na may kala­mangan pa rin ang tao sa takbuhan. Ang karaniwang bilis ng bipedal robots ay nasa 8 hanggang 12 km/h, habang ang mga bihasang marathon runners ay kaila­ngang tumakbo ng may bilis na 14 km/h upang matapos ang 21.1-kilometer race sa loob ng isa’t kalahating oras.

Isang mahalagang hamon din para sa mga robot ang kanilang baterya. Pinahintulutan ng mga organizer ang pagpapalit ng baterya sa gitna ng karera, na maaaring maging game-changer para sa mga sasabak na makina.

Hindi ito ang unang pagkakataon na sumabak ang mga robot sa isang marathon. Noong nakaraang taon, natapos ng Laibo 2, isang quadruped robot mula South Korea, ang isang buong marathon gamit lamang ang isang charging cycle. Gayunpaman, hindi ito makakasali ngayong Abril dahil ang patimpalak ay eksklusibo lamang para sa mga bipe­dal robots o robot na dalawa ang paa.

Samantala, ang Chinese-made bipedal robot na si Tiangong, na noong Oktubre ay tumakbo ng 100 metro sa Yizhuang Half Marathon para sa isang photo op, ay muling lalahok sa pagkakataong ito. Ngunit ngayon, ang layunin nito ay matapos ang buong karera kasama ang mga tao at kapwa robot.

Sa pagsasama ng teknolohiya at palakasan, ang half-marathon na ito ay hindi lang isang ordinaryong kumpetisyon kundi isang patunay sa mabilis na pag-unlad ng robotics. Ngunit ang tanong ay: sino ang mas matibay sa endurance race na ito, ang tao o ang robot? Malalaman natin ang kasagutan nito sa Abril.