Dagdag benepisyo sa dialysis

NOONG Oktubre 9, ipinatupad ng PhilHealth ang panibagong pagtaas sa benefits package para sa mga pasyente na nagda-dialysis, mula P4,000 hanggang P6,350 kada session. Ito ang magiging pangalawang pagtaas sa loob ng tatlong buwan. Sa karaniwang dialysis session na tatlong beses kada linggo, ang kabuuang halaga bawat taon na mapapakinabangan ng mga pasyente ay aabot sa halos P1-milyon. Magandang balita ito para sa mga nagda-dia­lysis. Kasama na sa bagong alokasyon ay ang epoetin injection, at buwanang laboratoryo.

Ang pagtaas ng benepisyo ng PhilHealth ay malaking­ tulong sa mga sumasailalim sa dialysis. Noon, P2,600 bawat session lang ang sagot ng PhilHealth, 90 sessions lang bawat taon. Nadagdagan ito ng 120 sessions, pagkatapos ay sa 144, at ngayon, 156 sessions na. Saklaw na nito ang buong taon.

Ang datos mula sa National Kidney and Transplant Ins­titute (NKTI) ay nagpapakita ng pagtaas sa bilang ng mga malalang sakit sa bato na nangangailangan ng dialysis. Hinihimok ng mga nephrologist ang mamamayan na maging mulat sa sakit sa bato at aktibong makibahagi sa pagpapanatili ng kalusugan nito.

Naniniwala ako na ang pagkain ng mga Pilipino ay medyo­ maalat at mamantika. Ang sobrang protina ay hindi rin ma­ganda para sa kalusugan ng bato. Diabetes ang isa pang dahilan ng sakit sa bato. Ang sobrang asin, asukal, at protina ay dapat bawasan upang maiwasang maging pasyente ng dialysis.

Bukod sa PhilHealth na sumasaklaw sa mga sesyon ng dialysis, sasagutin din ang halagang 600,000 pesos para sa taong sasailalim sa kidney transplant. Para sa mga mapalad na mabibigyan ng bato mula sa kadugong kamag-anak, magandang balita rin ito. Mas gusto ng PhilHealth ang mga low-risk na kidney transplant kaya naman mas pini­pili ang mga kamag-anak na donor. Mas mataas ang posibi­lidad na hindi matatanggihan ng katawan ang bagong kidney.

Palagi kong pinaninindigan na ang Pilipino ay hindi namu­muhunan nang malaki sa pangangalagang pangkalusugan. Kaya, bukod sa PhilHealth, ang mga may kakayahang gawin ito ay dapat ding magkaroon ng medical insurance mula sa pribadong sektor.

Magsaliksik kung sino ang makakapagbigay ng maaasahang tulong at hindi mula sa kompanyang tatakas o magbibigay ng kung anu-anong dahilan para tanggihan ang paghahabol. Ang mga kompanya ay dapat tumutulong sa panahon ng mga krisis sa kalusugan, at hindi nagbibigay nang napakaraming dahilan kung bakit hindi sakop sa kontrata ang paghahabol.