EDITORYAL — Baka makalusot din si Quiboloy
![EDITORYAL � Baka makalusot din si Quiboloy](https://media.philstar.com/photos/2024/08/20/o1_2024-08-20_21-53-39.jpg)
NAKALABAS na ng bansa ang pinatalsik na Bamban, Tarlac mayor Alice Guo. Noon pa raw Hulyo 18, 2024 ito nakalabas ng bansa at nagtungo sa Malaysia, gamit ang Philippine passport. Mula sa Malaysia, nagtungo sa Singapore si Guo at doon sila nagkita ng mga kaanak nito. Ayon kay Sen. Risa Hontiveros na nagsiwalat nang pagtakas ni Guo, mistulang nag-reunion sina Guo at mga magulang at kapatid nito sa Singapore.
Malaking katanungan ngayon kung paano nakalabas ng bansa si Guo gayung may hold departure order dito. Ipinangako noon ng Bureau of Immigration (BI) na mahigpit nilang binabantayan si Guo. Anyare at nakalabas? Sabagay, hindi na nakapagtataka ang nangyari sapagkat marami nang BI officials ang sangkot sa “pagpapasok” at “pagpapalabas” ng mga dayuhan partikular ang mga Chinese nationals kapalit nang malaking halaga ng pera. Sino ang makalilimot sa “pastillas scam”?
Tiyak na nagtatawa ngayon si Guo kung saan man siya naroon. Napaglalangan niya ang maraming Pilipino. Napaniwala niya ang mga taga-Bamban na Pilipino siya. Ibinoto siya at walang kahirap-hirap na nanalo. Nakaupo nang tatlong taon sa Bamban na hindi nabuking ang kanyang pagkatao.
Lahat nang mga nangyari ay nag-ugat sa korapsiyon. Mula sa pagpeke ng birth certificate sangkot ang mga corrupt sa Philippine Statistics Authority at pagpa-file ng certificate of candidacy sa Comelec. Maraming napalusutan si Guo. Maraming nalinlang dahil nasilaw sa pera. Sabi nga raw ng isang Chinese, kawawa raw ang mga Pilipino dahil madaling masilaw sa pera. Pera lang daw ang katapat. Kakahiya.
Wala na si Guo. Ang isang dapat pang bantayan ay si appointed son of God Pastor Apollo Quiboloy na hanggang ngayon ay hindi pa maaresto ng Philippine National Police. Si Quiboloy ay founder ng Kingdom of Jesus Christ ay nahaharap sa mga kasong child prostitution, sexual abuse, human trafficking, at acts of neglect, abuse, cruelty and exploitation. May nakapatong na P10 milyon sa kanyang ikadarakip. Tig-P1 milyon naman ang pabuya sa kanyang mga ka-miyembro na sina Cresente Canada, Ingrid Canada, Sylvia Camanes, Jackiely Roy at Paulene Canada. Tanging si Paulene Canada pa lamang ang naaaresto ng mga pulis.
Napabalita minsan na nasa China na raw si Quiboloy pero sabi ng kanyang mga abogado ay inaalam pa nila ang katotohanan ng balita. Sinabi naman minsan ni dating President Rodrigo Duterte na alam niya ang kinaroroonan ni Quiboloy pero hindi raw niya sasabihin.
Bantayan si Quiboloy at baka makalusot din siya katulad ni Guo. Gawin naman sana ng PNP ang trabaho nila para maaresto ang pastor at mga kasama.
- Latest