EDITORYAL - Bilang na ang araw ng mga pasaway

HINDI ba’t nakakainis at nakakapagpainit ng ulo kapag mayroong taong sumisingit sa pila? Halimbawa ay pila sa pagbabayad ng bill o kaya’y pila sa pagbili ng bigas, tinapay o kaya’y pila habang naghihintay ng taxi o anumang masasakyan. Ang matindi pa, ang mga sumisingit na ito ang kadalasan pang matatapang na para bang hari na sila ang dapat na mauna sa pila. Palibhasa’y marami sa mga Pilipino ang mapagpasensiya at mabait o kaya’y takot ang pinalalampas na lamang ang pasaway na sumisingit sa pila. Pero meron din naman na hindi makatiis kaya pinagmumulan ng away ang pagsingit sa pila.

Ang ganitong problema ang nakita ng dalawang party-list representatives kaya pinanukala ang House Bill 3953 o ang Anti-Pasaway Act of 2014. Layunin ng panukalang batas na maisaisip ng bawat isa ang disiplina, pagbibigayan, paggalang sa kapwa ganundin ang pagdating sa tamang oras. Ayon kina Ako Bikol Party-list Reps. Christopher Co at Rodel Batocabe, mahalaga ang disiplina sa bawat isa. Ang pag-cut sa pila para mauna ay nagdudulot ng pagtatalo at kung minsan ay madugo. Dapat nang maputol ang ganitong senaryo. Ang panukalang batas ay wala ring ipinagkaiba sa “wangwang” policy ni President Aquino. Walang hari-harian dito at lahat ay pantay.

Ayon sa panukala, ang sinumang lumabag ay parurusahan ng isang buwan na pagkakulong at multang P10,000. Kapag nangyari ang paglabag sa lugar na deklaradong may kalamidad, anim na buwang pagkakulong at P25,000 ang multa.

Napapanahon ang panukalang ito at dapat na suportahan. Maraming gustong maghari-harian na para bang sila ang dapat laging nasa una. Maski sa pila ng mga sasakyan ay nakikita rin ang mga pasaway. Ngayong may panukala na para sa mga pasaway, tiyak na mababawasan na ang mga ito at magkakaroon  na ng disiplina at paggalang sa kapwa. Hindi na uubra ang pasingit-singit sa pila. Ito ang kailangan para makita ang “daang matuwid”.