Masayang tahanan?

Si ama’t si ina ay nagbibiruan

kaya maligaya sa aming tahanan;

Ang utos ni ina ay agad susundan

ng biro ni amang mahina’t malaman!

Ang utos at biro ay parang totoo

kaya nangyayaring sila’y nagtatalo;

At itong si inang ay ayaw mabiro

dadampot na agad ng walis na tambo!

Sunod ay habulang hindi mo mawari

kaya mga anak ay nauunsyami;

Sila ay tulog pa kaya nangyayari

ang apat na anak ay natuturete!

Panganay na anak ay agad sisigaw

“Anong nangyayari sa loob ng bahay!”

Sa nangyaring yaon agad na sisinsay –

away mag-asawang hindi naman away!

Sana naman sana si mister at misis

kung nagbibirua’y sa sariling silid;

Sa sistemang ito’y hindi matsitsismis

nitong mga anak na nakikimasid!

Saka sa tahanan ang ama at ina

ay kapwa modelo sa tahanan nila;

Anumang alitang nagagawa nila

di dapat humantong sa maling akala!

Dahil inakalang kanilang biruan

ay totoong away sa isang tahanan;

Pagka’t nabulabog buong sambahayan

mga kapitbahay agad naglabasan!