2 babaeng magkaangkas sa motorsiklo, bumangga sa center island, dedo
MANILA, Philippines — Dead-on-the-spot ang dalawang babaeng magkaangkas sa isang motorsiklo nang bumangga ang sinasakyan nilang behikulo sa center island sa Sampaloc, Manila kahapon ng madaling araw.
Ang mga biktima ay nakilalang sina Reana Antoinette Tomas, 23, ng San Antonio, Parañaque City at Ana Mae Adlaon, ng Misamis Oriental.
Lumilitaw sa inisyal na report ng Manila District Traffic Enforcement Unit (MDTEU) na dakong alas-5:00 ng madaling araw nang maganap ang aksidente sa northbound lane ng Lacson Avenue, pababa sa Nagtahan bridge, kanto ng G. Tuazon St. sa Sampaloc.
Minamaneho ni Tomas ang motorsiklo, angkas si Adlaon, nang pagsapit sa pababang bahagi ng Nagtahan bridge ay bigla na lang nawalan ng kontrol sa behikulo.
Dahil dito, bumangga ang motorsiklo sa center island na nagresulta sa pagtilapon nila at pagbagsak sa sementadong kalsada.
Mabilis namang nakaresponde ang mga tauhan ng Triple D Philippine Eagle ngunit patay na ang mga biktima nang kanilang datnan.
- Latest
