3 hackers ng government website, huli ng NBI
![3 hackers ng government website, huli ng NBI](https://media.philstar.com/photos/2024/07/18/2_2024-07-18_22-34-48.jpg)
MANILA, Philippines — Naaresto ng mga elemento ng National Bureau of Investigation (NBI) ang tatlong umano’y nasa likod ng pag-hacked ng mga government websites.
Iniharap ni NBI director Jaime Santiago ang tatlong suspek kabilang ang isang “Newbiehacker” na sinasabing may hawak na file na code-protected at naglalaman ng sensitibong impormasyon mula sa data base ng Philippine Navy.
Sinabi ni Santiago, na ang data ay naipadala sa kanya ng isang “Haxinja” na mayroon ding access code para sa naturang data.
Sa ilalim ng superbisyon ng NBI-Cybercrime Division (NBI-CCD), ang confidential informant at si Haxinja ay nakipag-ugnayan sa telepono at nakipagkasundo na magtutulungan para sa isang proyekto na tinawag na “E-Commerce Website”.
Kinumpirma ni Haxinja na hawak niya ang pass code para ma-access ang Philippine Navy file at maibibigay sa kanilang meeting na naitakda nitong July 16, 2024 sa Cagayan de Oro City.
Sa pinaigting na utos ni Santiago, nagsagawa ang NBI-CCD sa koordinasyon sa NBI-NEMRO at Philippine Navy ng entrapment operation na nagresulta sa pagkakaaresto ni “Haxinja” makaraang ibigay ang access sa naka-hacked na file na kumpirmadong isang confidential document.
Ang ibang files sa flash drive ng suspek ay naglalaman ng iba’t ibang mga dokumento ang litrato na nakuha mula sa data base ng Philippine Navy.
Iniulat din ni Santiago na may isa pang hacker na si “D4rkJ1n” ay nahuli naman sa Cubao, Quezon City ng CCD operatives.
Unang nagsagawa ng operasyon ang NBI-CCD laban kay “D4rkJ1n” na nag-oopisina sa EDSA, Makati. Nang dumating ang mga NBI agents sa lugar ni “D4rkJ1n” ay nagtangka siyang tumakas sakay ng isang motorcycle taxi pero matagumpay na nahuli sa may intersection ng EDSA at Main Avenue, Cubao.
- Latest