2,600 trabaho nationwide, alok ng DOH

Sa ika-126 na anibersaryo

MANILA, Philippines — Umaabot sa 2,600 trabaho nationwide ang alok ng Department of Health (DOH) para sa health sector, kasabay nang pagdiriwang ng departamento ng kanilang 126th anibersaryo.

Ayon sa DOH, nitong Hunyo 18 pa lamang, kung kailan sinimulan ang job fair, ay nasa 375 aplikante na ang natanggap sa trabaho. Inaasahan nilang madaragdagan pa ang mga magkakatrabahong aplikante hanggang sa pagtatapos ng aktibidad ngayong Huwebes, Hunyo 20.

Layunin ng naturang proyekto na madagdagan ang workforce sa 76 operating units ng DOH, kabilang ang DOH Central Office, Centers for Health Development (CHDs), DOH Hospitals at Treatment and Rehabilitations Centers, na matatagpuan sa iba’t ibang lugar sa bansa.

“We are looking forward to having competent and committed health sector workers through the conduct of this nationwide job fair. This not only supports our commitment to implement Universal Health Cade nationwide, but also offers a chance for health workers to have fair compensation, decent work conditions, and opportunities for their career development – dahil sa Bagong Pilipinas, Bawat Buhay Mahalaga,” ayon kay Health Sec. Teodoro Herbosa.

Ang job fairs ay isinasagawa mula alas-9:00AM hanggang alas-4:00PM sa mga satellite DOH offices at mga venues gaya ng Dr. Jose Fabella Memorial Hospital sa Maynila, Western Visayas Medical Center sa Iloilo City, at mga participa­ting malls sa Cavite, La Union, Tuguegarao, Legaspi, Cebu, Zamboanga City, Cagayan de Oro City, at Davao City.

Ang anibersaryo ng DOH ngayong taon ay may temang “DOH @126: Pagdiriwang sa Kultura at Tradisyon tu­ngo sa Bagong Pilipinas.”