Serbian na wanted sa United States, nalambat ng BI
MANILA, Philippines — Nadakip ng mga tauhan ng Bureau of Immigration (BI) ang isang Serbian national na wanted sa Federal authorities sa Estados Unidos dahil sa pagbebenta ng ilegal na droga.
Si Predrag Mirkovic, 60, ay inaresto ng mga tauhan ng BI- Fugitive Search Unit (FSU) sa loob ng isang bar sa Angeles City, Pampanga noong Abril 25, sa bisa ng mission order mula kay Immigration Commissioner Norman Tansingco.
Nabatid na naglabas ng mission order si Tansingco laban sa suspek base na rin sa kahilingan ng US government na nagbigay ng impormasyon mayroong siyang arrest warrant na inisyu ng isang district court sa Maryland, sa kasong conspiracy to possess and distribute controlled substances na paglabag sa US penal code.
Sinabi naman ni BI-FSU Acting Chief Rendel Ryan Sy na bukod dito, nakatanggap din ang BI ng isang letter-complaint mula sa isang concerned citizen na si Mirkovic ay sangkot umano sa illegal drug trade sa Angeles City.
Hinihiling din ng complainant na maipa-deport si Mirkovic, na inilarawan pa nitong isang “undesirable alien”.
Nabatid pa na ang dayuhan ay mayroon ding nakabinbing warrant of arrest na inisyu naman ng Calamba, Laguna Regional Trial Court (RTC) dahil sa kasong paglabag sa Republic Act 9262, o Anti-Violence Against Women Act, na isinampa laban sa kanya ng dating Pinay partner.
- Latest
