MANILA, Philippines – Kalaboso ang isang 31-anyos na kasambahay nang pagdudahan ito na kasabwat ng grupo ng ‘Dugo gang’ na tumangay ng vault ng kaniyang amo na naglalaman ng cash at alahas na nagkakahalaga ng P2.5 milyon sa Binondo, Maynila, kamakalawa.
Ipinagharap ng reklamong qualified theft ang suspek na si Rosalie Mercado, tubong Tagaytay, Bacolod City at stay-in sa nasabing condominium ng amo nitong si Merriam Cai, 39, ng Tower A, Escolta Twin Tower sa Binondo Manila.
Kasama ring inireklamo ang sinasabing grupo na kinabibilangan ng isang matabang babae, may taas na 5 talampakan at blondie ang kulay ng buhok.
Sa imbestigasyon ni Chief Insp. Ronald Andres, deputy station commander ng Manila Police District-station 11, naganap ang insidente sa pagitan ng ala-1:00 hanggang alas-5:00 ng hapon sa loob ng nasabing unit.
Sinabi ni Mercado na may tumawag na babae na inakala niyang ang amo na nagsabing nasa ospital siya at kailangan ng malaking halaga kaya inutusan ito na dalhin ang vault na nasa master bedroom sa isang foodchain sa Bambang St., sa Sta Cruz, Maynila.
Kinuwestiyon umano ng guwardiya ng condo ang suspek at nagdahilan na ipadadala niya sa LBC forwarder ang nakabalot na kahon, na hindi niya sinabing isa itong vault. Dinala niya umano sa nasabing lugar ang vault na kinuha ng isang matabang babae.
Dahil sa paiba-iba umano ang sinasabi ng suspek at hin-di matukoy o maituro sa mga pulis kung saang foodchain nito dinala kaya pinaghinalaan siya ng amo at ng mga pulis na kasabwat sa krimen.