MANILA, Philippines – Utas ang isa sa tatlong mangingisda na sinasabing nahuling nagnanakaw sa isang barge makaraang mabaril ng security guard sa South Harbor, Port Area, Maynila, kamakalawa ng madaling-araw.
Binawian ng buhay sa Ospital ng Maynila ang biktimang si Michael Garcia, 39, ng B4 Baseco Old Site, Port Area, Maynila, dahil sa mga tinamong tama ng bala ng baril sa katawan.
Nakaratay pa sa nasabing pagamutan ang dalawang sugatang kasamahan nito na sina Leonardo Eson at John Paul.
Agad namang sumuko sa Baseco Police Community Precinct (PCP) ang suspek na si Jeffrey Toralba, 28, ng Fairview, Quezon City, nakatalagang sekyu sa barge na nakadaong sa Manila Bay.
Sa ulat ni PO3 Jose Kabigting, ng Manila Police District-Homicide Section , dakong alas-5:30 ng umaga nang maaktuhan umano ng sekyu na inililipat ng tatlong biktima ang mga kahoy na ninakaw mula sa barge patungo sa kanilang bangka kung kaya pinaputukan niya ang mga ito.
Isang alyas Buboy pa umano ang nakatakas na tumalon sa dagat at hindi na inabutan.