Taxi driver kritikal sa holdap

MANILA, Philippines – Isang taxi driver ang sinaksak matapos itong pumalag sa panghohol­dap ng kanyang pasa­hero kahapon ng mada­ling araw sa Makati City.

Sugatan at ginagamot sa St. Luke’s Hospital, Bonifacio Global City (BGC) ang biktimang si Ronnie Sasota, 33, may asawa, taga #1712 Brockside Berkelly, Ca­inta, Rizal, nagtamo ito ng saksak sa katawan.

Nakakulong naman sa Makati City Police detention cell ang suspek na si Margarito Ortiz “alias Waway”, 36, nakatira sa #231 Tawi-Tawi St., Barangay Pitogo ng naturang lungsod.

Lumalabas sa pagsisiyasat ni PO3 Reynaldo Agustin, ng Theft and Robbery Section, Makati City Police, naganap ang insidente alas-2:40 kahapon ng madaling araw sa kahabaan ng Surigao St., Bgy. Pitogo ng natu­rang lungsod.

Pinapasada ng biktima ang taxi nito na may plakang UVT-970 at habang binabagtas nito ang naturang lugar ay bigla siyang pinara ng suspek.

Huminto ang biktima sa pag-aakalang pasahero ito at nang makasakay na ang suspek sabay na nagdeklara ito ng holdap nang tutukan nito ng patalim si Sasota.

Pumalag si Sasota at dito na siya inunda­yan ng saksak ni Ortiz­, mabuti na lamang na­mataan nang nagrorondang mga  tanod  at dito nilang na­kitang duguan ang naturang biktima.

Papatakas na sana ang suspek, subalit nasakote ito ng mga tanod at ang biktima naman ay dinala ng rescue team sa naturang ospital. Iniim­bestigahan pa ng pulisya ang naturang insidente.