MANILA, Philippines – Pinagbabaril hanggang sa mapatay sa harap ng kanyang misis ang isang barangay tanod ng dalawang hindi nakilalang mga salarin na magkaangkas sa motorsiklo, kamakalawa ng gabi sa Caloocan City.
Isinugod pa sa Caloocan City Medical Center ngunit nalagutan rin ng buhay ang 39-anyos na si Virgilio Santiago, ng Block 14 C3 Road, Pama Sawata, ng naturang lungsod.
Sa ulat, katatapos lang ng biktima at ng kanyang misis na si Rezaida na magpakain ng mga alagang baboy at manok nang magdesisyon na tumambay kasama ang ilang kapitbahay sa may Block 15.
Dito sumulpot ang dalawang salarin lulan ng isang motorsiklo at pagbabarilin ang biktima saka mabilis na tumakas tungo sa direksyon ng Navotas City.
Bigo naman ang mga tauhan na agad na makarespon-de at masakote ang mga salarin. Hinihinala na may kaugnayan sa kanyang trabaho bilang tanod ang naturang pamamaril.