Homeowners president, itinumba

MANILA, Philippines – Utas ang presidente ng isang homeowners association matapos itong pagbabarilin ng hindi pa nakikila­lang suspek, kahapon sa Ta­guig City.

Dead-on-the-spot ang biktimang si Datu Abdul, 56, nakatira sa Maguindanao St. Purok 3, Brgy. New Lower Bi­cutan at Pangulo ng Lot Association sa C-6, Brgy. Na­­pindan ng naturang lung­sod sanhi ng tinamong mga tama ng bala ng M-16 armalite rifle.

Nagsasagawa pa ng follow-up ang pulisya hinggil sa insidente at inaalam na ang pagkakakilanlan ng suspek.

Sa ipinarating na report kahapon ni Senior Supt. Arthur Felix Asis, hepe ng Taguig City Police sa tanggapan ni Police Chief Supt. Henry Ranola, district director ng Southern Police District Office (SPDO), naganap ang insidente alas-8:50 habang  nakatayo ang biktima sa naturang lugar nang biglang sumulpot ang suspek, na nakasakay sa isang motorsiklo at armado ng armalite.

Walang salitang pinaulanan ng bala ang biktima, dahilan ng agaran nitong kamatayan at ang suspek naman ay mabilis na tumakas matapos isagawa ang pamamaril.

Sa ngayon ay iniimbestigahan pa ng pulisya ang naturang insidente kung saan inaalam din kung ano ang motibo sa pamamaslang.