MANILA, Philippines - Patay na nang madiskubre ang isang 35-anyos na helper na nakaluhod habang nakabigti sa loob ng kaniyang bahay, sa Sampaloc, Maynila, kamakalawa ng gabi.
Pinaniniwalaang ang mga problema bunga ng pagka-suspendi sa trabaho at ang pag-iwan ng live-in partner ang dahilan nang pagpapakamatay ni Rey Kilmare, ng Leyte St., Sampaloc, Maynila.
Sa ulat ni SPO3 Glenzor Vallejo, ng Manila Police District-Homicide Section, dakong alas-7:30 ng gabi nang madiskubreng walang buhay ang biktima sa loob ng inuupahan nitong kuwarto.
Sinabi ni Ricky Caleas, pinsan ng nasawi na noong nakalipas na linggo ay problemado na ang biktima sa pagkakasuspinde sa kaniyang trabaho at bukod pa sa masamang loob nang iwan ng kinakasama tatlong linggo na ang nakakaraan.
Idinagdag pa nito na umalis siya ng bahay alas-12:00 ng tanghali nang pag-uwi niya ay nakita na nakabigti na ang pinsan sa nylon cord. (Ludy Bermudo)