MANILA, Philippines - Patay ang isang 19- anyos na coed matapos tadtarin ng saksak ng karelasyong may-asawa na kritikal din ang buhay matapos maglaslas ng leeg sa Sta. Mesa, Maynila, kahapon ng umaga.
Isinugod sa University of the East Ramon Magsaysay Medical Center (UERMMC ) ang biktimang si Jackie Bugay, ng Sta. Mesa, Maynila subalit binawian ng buhay bunga ng maraming saksak na tinamo sa iba’t ibang bahagi ng katawan.
Nilalapatan pa ng lunas sa nasabi ring pagamutan ang suspek na lihim umanong karelasyon ni Bugay, na kinilalang si Joseph Espiritu, 32, may-asawa, call center agent, ng San Pablo City, Laguna.
Sa ulat ni SPO1 Chistian Caparas ng Manila Police District-Homicide Section, dakong alas-9:00 ng umaga nang matuklasan ang krimen sa condominium na tinitirhan ng biktima sa Sta. Mesa.
Nabatid na ang kasambahay na si Recil Ramos ang nakadiskubre ng krimen.
Sa kaniyang salaysay, namalengke umano siya bandang alas-5:00 ng madaling araw at iniwan pa na magkatabing matulog sa sala ng condo ang biktima at suspect.
Pagbalik niya ay narinig ang pagsigaw ng biktima, na tila sinasaktan. Tinangka niyang pumasok subalit naka-lock ang pinto kaya napilitan siyang humingi ng tulong sa sekyu sa condominium na si Espino Reyes para mabuksan ito.
Nahirapang pasukin ang condo unit ng biktima kaya nagdaan pa sa likurang pintuan at doon nakitang duguan si Bugay na katabi pa ang menor de edad na kapatid.
Kapwa isinugod sa nasabing pagamutan subalit minalas na bawian agad ng buhay si Bugay.
Sa impormasyon ng mga awtoridad, nais umanong kumalas ng babae sa karelasyong si Espiritu dahil sa nakatakdang pangingibang bansa nito makaraang maaprubahan ang petisyon ng ina.