MANILA, Philippines - Bulagta ang 29-anyos na kawani ng isang car company makaraang makipagbarilan sa mga operatiba ng pulisya na sumita sa pagiging reckless driver nito kamakalawa ng gabi sa Parañaque City.
Kinilala ang biktima na si Timothy James Alon ng M. Panlilio St., BF Resort Village, Las Piñas City, at kawani ng Mitsubishi Motors.
Sa inisyal na ulat na natanggap ni P/Senior Supt. Ariel Andrade, hepe ng Parañaque City PNP, naganap ang insidente bandang alas-8 ng gabi sa panulukan ng Aguirre Avenue at El Grande Avenue, Parañaque City hanggang sa umabot sa Tropical Avenue sa Las Piñas City.
Nabatid na minamaneho ni Alon ang itim na Mitsubishi Montero Sport (UZI-388) na sinasabing pagewang-gewang ang pagmamaneho kaya sinita ni PO1 Khevin-Klein Bueno ng Muntinlupa City PNP.
Gayon pa man, sa halip na tumigil ang biktima ay pinaharurot ang sasakyan kaya hinabol ito ni P01 Bueno kung saan humingi ng assistance sa Parañaque City PNP.
Rumesponde naman ang mga tauhan SWAT ng Paranaque City PNP upang arestuhin si Alon subalit pinutukan ang pangkat ng PNP na nauwi sa shootout.
Narekober sa sasakyan ni Alon ang apat plastic sachet na shabu at cal. .45 pistol na ginamit nito sa pakikipagbarilan sa mga pulis habang patuloy naman ang imbestigasyon.